ସତ୍ତାରୁ ଯିବା ପରେ ଏବେ ଖସୁଛି ବିଜେଡିର ଦଳୀୟ ପାଣ୍ଠି

ଓଡ଼ିଶାରେ କ୍ଷମତାରୁ ଯିବା ପରେ ଏବେ ବିଜେଡିର ପାଣ୍ଠି ଉପରେ ବଡ଼ ପ୍ରଭାବ ପଡ଼ିଛି । ଆସୁଛି କମ୍, ହେଲେ ଖର୍ଚ୍ଚ ହେଉଛି ଅଧିକ । ADR ଅର୍ଥାତ୍ ଆସୋସିଏସନ ଫର ଡେମୋକ୍ରାଟିକ୍ ରିଫର୍ମସର ସଦ୍ୟ ପ୍ରକାଶିତ ରିପୋର୍ଟରୁ ସାମ୍ନାକୁ ଆସିଛି ଏଭଳି ଏକ ଚମକାଇଲା ଭଳି ତଥ୍ୟ ।

କେବଳ ବିଜେଡି ନୁହେଁ, ଦେଶର ପ୍ରାୟ ୩୬ଟି ଆଞ୍ଚଳିକ ଦଳର ଆୟ ପୂର୍ବ ଅପେକ୍ଷା ଯଥେଷ୍ଟ କମିଛି । ସରକାର ବଦଳିବା ପରେ ବଦଳି ଯାଇଛି ଆଞ୍ଚଳିକ ଦଳଗୁଡ଼ିକର ଆର୍ଥିକ ସ୍ଥିତି ।

ଆସୁଛି କମ୍, ଯାଉଛି ଅଧିକ । ସତ୍ତାରୁ ଯିବା ପରେ ଏବେ ଖସୁଛି ବିଜେଡିର ଦଳୀୟ ପାଣ୍ଠି । ଗତ ମେ ୨୭ରେ ପ୍ରକାଶ ପାଇଥିବା ADR ରିପୋର୍ଟରେ ଏଭଳି ତଥ୍ୟ ସାମ୍ନାକୁ ଆସିଛି । ରିପୋର୍ଟ ଅନୁଯାୟୀ, ୨୦୨୪-୨୫ ଆର୍ଥିକ ବର୍ଷରେ ବିଜେଡିର ମୋଟ ଆୟ ୧୧୦ କୋଟି ଟଙ୍କା ଥିବାବେଳେ ଦଳ ଖର୍ଚ୍ଚ କରିଛି ପ୍ରାୟ ୨୮୮ କୋଟି ଟଙ୍କା ।

ଏହି ୧୧୦ କୋଟି ମଧ୍ୟରୁ ଦଳ ୬୦ କୋଟି ଟଙ୍କା ଡୋନେସନ୍ ବା ପାଣ୍ଠି ସୂତ୍ରରୁ ପାଇଥିବା ବେଳେ ୫୦ କୋଟି ଟଙ୍କା ବ୍ୟାଙ୍କ ସୁଧ ଆକାରରେ ପାଇଛି । ବଡ଼ କଥା ହେଉଛି, ୨୦୨୪ ନିର୍ବାଚନ ପୂର୍ବରୁ ଅର୍ଥାତ୍ ୨୦୨୩-୨୪ ବର୍ଷରେ ବିଜେଡି ପ୍ରାୟ ୨୯୭ କୋଟି ଟଙ୍କା ଆୟ କରିଥିଲା । ତେବେ ବିରୋଧୀ ଦଳରେ ଥିବା ବେଳେ ପାଣ୍ଠି କମିବା କୌଣସି ବଡ଼ କଥା ନୁହେଁ ବୋଲି କହିଛନ୍ତି ବିଜେଡି ଉପସଭାପତି ସଞ୍ଜୟ ଦାସ ବର୍ମା ।