ବାଲେଶ୍ବର ଜିଲ୍ଲା ଭୋଗରାଇ ପଞ୍ଚାୟତ ପରିସର ରେ ବିଜେପି ବିଜେଡି ମୁହାଁ ମୁହିଁ l

ଭୋଗରାଇ ପଞ୍ଚାୟତ ସମିତି ପରିସରରେ ବିଧାୟକ ଗୌତମ ବୁଦ୍ଧ ଦାସଙ୍କ ଅଧ୍ୟକ୍ଷତାରେ ଆୟୋଜିତ ଉନ୍ନୟନ ସମୀକ୍ଷା ବୈଠକ ସମୟରେ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା। ସୂଚନା ଅନୁସାରେ, କିଛି ବିଜେପି କର୍ମୀ ଜୋରଜବରଦସ୍ତି ବୈଠକ କକ୍ଷରେ ପ୍ରବେଶ କରି ଉଚ୍ଚ ସ୍ୱରରେ ସ୍ଲୋଗାନ ଦେବା ସହ ହୋହଲ୍ଲା କରିଥିଲେ। ଏହାଫଳରେ ବୈଠକର କାର୍ଯ୍ୟକ୍ରମ କିଛି ସମୟ ପାଇଁ ବାଧାପ୍ରାପ୍ତ ହୋଇଥିଲା।

ଘଟଣାସ୍ଥଳରେ ଉପସ୍ଥିତ ଥିବା ବିଡିଓ (BDO) ପ୍ରଥମେ ସେମାନଙ୍କୁ ଏପରି ଆଚରଣର କାରଣ ପଚାରିବା ସହ ବୈଠକ କକ୍ଷରୁ ବାହାରିଯିବାକୁ ଅନୁରୋଧ କରିଥିଲେ। କିନ୍ତୁ ବାହାରିବା ପରିବର୍ତ୍ତେ ସମ୍ପୃକ୍ତ କର୍ମୀମାନେ ଅଧିକ ଉତ୍ତେଜନା ସୃଷ୍ଟି କରିଥିଲେ ଏବଂ "ଜୟ ଶ୍ରୀରାମ" ସ୍ଲୋଗାନ ଦେଇ ବୈଠକରେ ବିଘ୍ନ ସୃଷ୍ଟି କରିବାକୁ ଚେଷ୍ଟା କରିଥିବା ଅଭିଯୋଗ ହୋଇଛି। ପରିସ୍ଥିତି ଅଣାୟତ୍ତ ହେବାରୁ ପୋଲିସ ଘଟଣାସ୍ଥଳରେ ପହଞ୍ଚି ସମ୍ପୃକ୍ତ ବ୍ୟକ୍ତିମାନଙ୍କୁ ସେଠାରୁ ହଟାଇଥିଲା। ଏହାପରେ ପରିସ୍ଥିତି ସ୍ୱାଭାବିକ ହେବା ସହ ଉନ୍ନୟନ ସମୀକ୍ଷା ବୈଠକ ପୁନର୍ବାର ଆରମ୍ଭ ହୋଇଥିଲା।

ବୈଠକରେ ଏଭଳି ହଟ୍ଟଗୋଳ ଓ ବିଘ୍ନ ସୃଷ୍ଟି ଘଟଣାକୁ ନେଇ ସାଧାରଣରେ ପ୍ରଶ୍ନ ଉଠିଛି। ବିଧାୟକ ଗୌତମ ବୁଦ୍ଧ ଦାସ ଏପରି କାର୍ଯ୍ୟକଳାପକୁ କଡ଼ା ଭାଷାରେ ନିନ୍ଦା କରିବା ସହ ଘଟଣାର ତଦନ୍ତ କରାଯାଇ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି। ଅନ୍ୟପକ୍ଷରେ, ଏହି ଘଟଣାକୁ ନେଇ ସ୍ଥାନୀୟ ରାଜନୈତିକ ମହଳରେ ଚର୍ଚ୍ଚା ଜୋର ଧରିଛି।