ଅଣ୍ଡା ଖାଇଗଲେ ଅଙ୍ଗନୱାଡି ଦିଦି

• ଥାଳିରୁ ଅଣ୍ଡା ଗଲା କେଉଁଠି?
• ବର୍ଷକର ଅଣ୍ଡା ଖାଇଗଲେ କି ଅଙ୍ଗନୱାଡି ଦିଦି?
• ଉପାସରେ ଫେରୁଛନ୍ତି କୁନି କୁନି ଶିଶୁ
• ସରକାରୀ କାଗଜରେ ରହିଛି ଅଣ୍ଡାର ହିସାବ 
• ଅଙ୍ଗନୱାଡି ଦିଦିଙ୍କ ପର୍ଦା ଫାସ 

ବାସୁଦେବପୁର ବ୍ଲକ ବ୍ରାହ୍ମଣଗାଁ ପଞ୍ଚାୟତର ବୈକୁଣ୍ଠପୁର -୧ ଅଙ୍ଗନୱାଡି କେନ୍ଦ୍ରରେ କାମ କରୁଥିବା ଅଙ୍ଗନୱାଡି ଦିଦି କିଶୋରୀ ବାଳିକାଙ୍କ ବର୍ଷକର ଅଣ୍ଡା ଖାଇ ଯାଇଥିବାର ଅଭିଯୋଗ ହୋଇଛି । ସରକାରୀ କାଗଜ ପତ୍ରରେ ଅଣ୍ଡା ବଣ୍ଟନ ହୋଇ ଥିବାର ଦର୍ଶାଯାଇ ଥିବାବେଳେ କାହିଁକି ଅଣ୍ଡା ଦେବ ନାହିଁ ବୋଲି ପ୍ରଶ୍ନ କରି ଅଙ୍ଗନୱାଡି ଦିଦିଙ୍କୁ ଘେରିଥିଲେ କିଶୋରୀ ବାଳିକା । ଚାଲିଥିଲା ଜୋରଦାର ପାଟିତୁଣ୍ଡ। ଲାଗିଥିଲା ଗହଳି । ସୃଷ୍ଟି ହୋଇଥିଲା ମୁହାଁମୁହିଁ ପରିସ୍ଥିତି । ଲାଗି ରହିଥିଲା ଉତ୍ତେଜନା ମୂଳକ ପରିସ୍ଥିତି। ତେବେ ଏହା ଅଙ୍ଗନୱାଡି ଦିଦିଙ୍କ ଅବହେଳା, ସରକାର ପଠେଇଥିବା ପଇସାକୁ ନିଜ ହକ ଭାବି ନେଇଛନ୍ତି ଦିଦି? ନା ଏହା ପଛରେ ରହିଛି ଆଉ କାହାର ହାତ ?

                                       ଅଙ୍ଗନୱାଡି କେନ୍ଦ୍ରର କର୍ମୀ ସରୋଜିନୀ ରାୟ  ଅର୍ଥ ଆସିନଥିବାରୁ ବଣ୍ଟନ କରାଯାଇ ନଥିଲା ବୋଲି ବାହାନା କରି ଖସି ଯିବାକୁ ଚେଷ୍ଟା କରିଥିଲେ । ଅନ୍ୟପଟେ କିଶୋରୀ ବାଳିକା ମଧ୍ୟ ଛାଡିବା ଲୋକ ନୁହନ୍ତି । କାହିଁକି ଦିଆଯାଉନି ପିଲାମାନଙ୍କୁ ଅଣ୍ଡା? ବାର ବାର କହିବା ସତ୍ୱେ କରୁଛନ୍ତି ଅବହେଳା ? କିପରି ମିଳିବ କିଶୋରୀ ବାଳିକାଙ୍କୁ ପୁଷ୍ଟିକର ଖାଦ୍ୟ ? ଏପରି ଅନେକ ପ୍ରଶ୍ନର ଉତ୍ତର ମାଗିଛନ୍ତି କିଶୋରୀ ବାଳିକା। ମୁଖ୍ୟମନ୍ତ୍ରୀ ସମ୍ପୂର୍ଣ୍ଣ ପୃଷ୍ଠି ଯୋଜନା (ଏମ.ଏସ.ପି.ୱାଇ.) ରେ ପ୍ରଦାନ କରାଯାଉଛି ପୃଷ୍ଟିକର ଖାଦ୍ଯ। ଏହି ଯୋଜନାରେ କିଶୋରୀ ବାଳିକାମାନଙ୍କୁ ଯୋଗାଇ ଦିଆଯାଉଛି ଅଣ୍ଡା ସହିତ ମୁଢୀ ଓ ସୁଲା । ଏକ ବର୍ଷ  ଧରି ସରକାରୀ କାଗଜ କଲମରେ ବଣ୍ଟନ ରିପୋର୍ଟ ଯାଉଥିବା ବେଳେ କିଶୋରୀ ବାଳିକାମାନଙ୍କୁ ଅଣ୍ଡା ପ୍ରଦାନ କରାଯାଇ ନାହିଁ ବୋଲି ଅଭିଯୋଗ ଆସିଛି । ନିଜର ହକ୍ ପାଇଁ ନଛୋଡବନ୍ଧା ସାଜିଛନ୍ତି ଯୁବତୀମାନେ । ମୁଖ୍ଯମନ୍ତ୍ରୀ ସମ୍ପୂର୍ଣ୍ଣ ପୃଷ୍ଟି ଯୋଜନାରେ ପ୍ରତି ସପ୍ତାହରେ ୪ ଟି ଅଣ୍ଡା ପ୍ରଦାନ କରାଯିବାର ନିୟମ ରହିଛି । ଅଣ୍ଡା ସହିତ ମୁଢୀ ଓ ସୁଲା ଭଜା କିଶୋରୀ ବାଳିକାମାନଙ୍କୁ ପ୍ରଦାନ କରାଯାଉଅଛି । ବୈକୁଣ୍ଠପୁର ଅଙ୍ଗନୱାଡି କେନ୍ଦ୍ରରେ ଅପ୍ରେଲ-୨୫ ଠାରୁ ମାର୍ଚ୍ଚ ମାସ ପର୍ଯ୍ୟନ୍ତ ପ୍ରଦାନ କରାଯାଇ ନାହିଁ ଅଣ୍ଡା ।

                                         ଉଭୟଙ୍କ ମଧ୍ଯରେ ମୁହାଁ ମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଏପରିକି ୧୫ ଦିନ ଧରି କୁନି କୁନି ଶିଶୁମାନେ ରନ୍ଧା ଖାଦ୍ଯ ନପାଇ ଉପାସରେ ଫେରୁଛନ୍ତି ବୋଲି ଅଭିଯୋଗ କରିଛନ୍ତି ଅବିଭାବକ। ବାସୁଦେବପୁର ବ୍ଲକ ଓ ପୌରପାଳିକାର ରହିଛି ୪୨୨ ଗୋଟି ଅଙ୍ଗନୱାଡି କେନ୍ଦ୍ର ରହିଛି। ଏହି କେନ୍ଦ୍ରକୁ ୧୮ ଟି ସେକ୍ଟରରେ ବିଭକ୍ତ କରାଯାଇଛି । ସିଡିପିଓଙ୍କ କାର୍ଯ୍ଯାଳୟରେ ଏକ ବର୍ଷ ଧରି କିରାଣୀଟିଏ ନାହିଁ । କିରାଣୀ ପଦବୀ ଖାଲି ପଡିଥିବାରୁ ନଥିପତ୍ର କାମ କରିବା, ପ୍ରତି ଅଙ୍ଗନୱାଡି କେନ୍ଦ୍ରକୁ ଅର୍ଥ ପ୍ରଦାନ କରିବା କଷ୍ଟକର ହୋଇ ପଡୁଛି। ସିଡିପିଓଙ୍କର କେନ୍ଦ୍ର ପରିଦର୍ଶନ କରିବାକୁ ଗାଡିଟିଏ  ନଥିବାରୁ ସଠିକ ଭାବେ ଯାଞ୍ଚ କରିବା ସମ୍ଭବ ହେଉନାହିଁ । ଏହାର ସୁଯୋଗ ନେଇ ଅଙ୍ଗନୱାଡି କେନ୍ଦ୍ରର କର୍ମୀ ଅଣ୍ଡା ଏବଂ ଅନ୍ୟାନ୍ୟ ଖାଦ୍ୟ ଖାଇ ଯାଉ ଥିବାର ଅଭିଯୋଗ ଆସୁଛି । ବହୁ ସମୟରେ ବିଭିନ୍ନ ଆଳ ଦେଖାଇ ଚତୁରତାର ସହିତ ଖସି ଯାଉଛନ୍ତି ଅଙ୍ଗନୱାଡି ଦିଦି । ପ୍ରତିମାସ ଅଣ୍ଡା ବଣ୍ଟନ କରୁଛନ୍ତି ବୋଲି ସରକାରୀ କାଗଜ ପତ୍ରରେ ରିପୋର୍ଟ କରାଯାଉଛି । ପ୍ରତିମାସ ସରକାରଙ୍କୁ ଯାଉଛି ଖାଦ୍ୟ ବଣ୍ଟନ ରିପୋର୍ଟ । ହେଲେ ବାସ୍ତବ ଚିତ୍ରଟି ସମ୍ପୂର୍ଣ୍ଣ ଭିନ୍ନ । ଏହି କେନ୍ଦ୍ରରେ ରହିଛନ୍ତି ୩୫ ଜଣ କିଶୋରୀ ବାଳିକା । ଏକ ବର୍ଷ ଧରି ଯୋଜନାରୁ ବଞ୍ଚିତ ହୋଇ ଆସୁଛନ୍ତି ।  ତଦନ୍ତ କରି କାର୍ଯ୍ଯାନୁଷ୍ଠାନ ଗ୍ରହଣ କରିବାକୁ କିଶୋରୀ ବାଳିକାମାନେ ଜିଲ୍ଲାପାଳଙ୍କୁ ଦାବି କରିଛନ୍ତି ।