୮ ରୁ ୧୧ ପର୍ଯ୍ୟନ୍ତ ଚାଲିବ ରତ୍ନ ଭଣ୍ଡାର ଗଣତି

ଭୁବନେଶ୍ୱର ଅସ୍ମିତାଟିଭି ଲାଇଭି: ଗତ କାଲି ଠାରୁ ବାହାର ଭଣ୍ଡାର ଗଣତି ଆରମ୍ଭ ହୋଇଛି । 8 ତାରିଖ ଠାରୁ ୧୧ ତାରିଖ ପର୍ଯ୍ୟନ୍ତ ରତ୍ନ ଭଣ୍ଡାର ଗଣତି ଚାଲିବ। ରବିବାର ୧୨ ତାରିଖ ଗଣତି ପ୍ରକ୍ରିୟା ବନ୍ଦ୍ ରହିବା ପରେ ପୁଣି ୧୩ ତାରିଖ ଏବଂ ୧୬ ତାରିଖରୁ ୧୮ ତାରିଖ ପର୍ଯ୍ୟନ୍ତ ଗଣତି କାର୍ଯ୍ୟ ହେବ। ସ୍ବଚ୍ଛତା ଓ ସୁରକ୍ଷା ଦୃଷ୍ଟିରୁ ଗଣତି କାର୍ଯ୍ୟ ପାଇଁ ସମୟ ଆବଶ୍ୟକ ହୋଇଥିବାରୁ ଶନିବାର ମଧ୍ୟ ଗଣତି କାର୍ଯ୍ୟ ହେବ । ପୂର୍ବରୁ ଶନିବାର ଓ ରବିବାର ଗଣତି କାର୍ଯ୍ୟ ବନ୍ଦ୍ ରହିବ ବୋଲି ନିଷ୍ପତ୍ତି ନିଆଯାଇଥିଲା । ତେବେ ଗଣତି ସମୟରେ ବାହାର କାଠରୁ ଦର୍ଶନ କରିବେ ଶ୍ରଦ୍ଧାଳୁ ।

ରତ୍ନ ଭଣ୍ଡାର ଗଣତି ଠିକ ଭାବରେ ଚାଲୁଛି କି ନାହିଁ ଏହାର ଅନୁସନ୍ଧାନ କରିବା ପାଇଁ ଗଜପତି ମଧ୍ୟ ସମ୍ପୂର୍ଣ୍ଣ ଟିମ ସହ ସେଠାରେ ଉପସ୍ଥିତ ଥିଲେ । ଏହାକୁ ନେଇ ଗଜପତି କହିଛନ୍ତି ଯେ, ଏହା ସମ୍ବେଦନଶୀଳ ଏକ ପ୍ରସଙ୍ଗ ଏବଂ ସମୟ ସାପେକ୍ଷ । ଏହାର କୌଣସି ଡେଡ୍ ଲାଇନ୍ ନାହିଁ । ପ୍ରତି ଟି ପର୍ଯ୍ୟାୟରେ ଗଣତି ମଣତିକୁ ଗୁରୁତର ସହ ନିଆଯାଉଛି ।

ଅନ୍ୟପଟେ ଛତିଶା ନିଯୋଗ ମହାନାୟକ କହିଛନ୍ତି , 30 ପ୍ରତିଶତ ସରିଛି ବାହାର ଭଣ୍ଡାର ଗଣତି କାର୍ଯ୍ୟ । ଗୋଟିଏ ଗୋଟିଏ ଆର୍ଟିକିଲର ଗଣତି ମଣତି, ମ୍ୟାପିଙ୍ଗ, ତାଲିକା ପାଇଁ 30 ରୁ 40 ମିନିଟ୍ ସମୟ ଲାଗୁଛି ।

ସେହିପରି ଶ୍ରୀମନ୍ଦିର ମୁଖ୍ୟ ପ୍ରଶାସକ କହିଛନ୍ତି ଯେ, ଭିଡିଓ ଗ୍ରାଫି, ଡକ୍ୟୁମେଣ୍ଟେସନ , 3D ମ୍ୟାପିଙ୍ଗ ଜିଲ୍ଲାପାଳଙ୍କ ନେତୃତ୍ୱରେ ସୁପର୍ ଭାଇଜିଙ୍ଗ କରାଯାଉଛି । ତରବରିଆ ଭାବରେ କୌଣସି କାର୍ଯ୍ୟ କରାଯାଉନାହିଁ। ଆସନ୍ତାକାଲି ମଧ୍ୟ ସକାଳ ଧୂପ ଶେଷ ପରେ ଗଣତି କାର୍ଯ୍ୟ ଆରମ୍ଭ ହେବ । ପ୍ରତ୍ୟେକ ଦିନ କାର୍ଯ୍ୟର ଅଗ୍ରଗତି ସୂଚନା ଦିଆଯିବ।8,9,10,11,13,16,17,18 ତାରିଖ ପର୍ଯ୍ୟନ୍ତ ଚାଲିବ ଗଣତି କାର୍ଯ୍ୟ ।

ତେବେ ଦେଖିବାକୁ ବାକି ରହିଲା ଏତେ ଦିନ ଧରି ଚାଲିଥିବା ଗୁଜବ ଯେ ରତ୍ନ ଭଣ୍ଡାରରେ ଥିବା ଅଳଙ୍କାର ଚୋରି ହୋଇଛି ତାହା ସତ କି ମିଛ କେବେ ସାମ୍ନାକୁ ଆସିବ ?