ମାଡ଼ି ଆସୁଛି କାଳବୈଶାଖୀ ବର୍ଷା

ସକାଳେ ଜଳାଉଛି ଆଉ ସନ୍ଧ୍ୟାରେ ଭିଯାଉଛି । ହଠାତ ହଠାତ ବଦଳୁଛି ପାଗର ମିଜାଜ୍। ଆଜି କଳାହାଣ୍ଡି, କନ୍ଧମାଳ, ରାୟଗଡା, ମାଲକାନଗିରି ଓ କୋରପୁଟ ଜିଲ୍ଲାରେ ବିଜୁଳି ଘଡ଼ଘଡ଼ି ସହ ହାଲୁକା ବର୍ଷା ସମ୍ଭାବନା ରହିଛି । ଏହା ସହ ୩୦ ରୁ ୪୦ କିମି ପବନ ବୋହିବା ନେଇ ୟେଲୋ ୱାର୍ଣ୍ଣିଂ ଜାରି କରିଛି ପାଣିପାଗ ବିଭଗ । ଆସନ୍ତା ତିନି ଦିନ ପାଇଁ କାଳବୈଶାଖୀ ବର୍ଷା ଜାରି ରହିବ ଏବଂ ଧୀରେ ଧୀରେ ବଢିବ ଏହାର ପ୍ରଭାବ। ବିଭିନ୍ନ ସ୍ଥାନରେ ବିଜୁଳି ଘଡ଼ଘଡ଼ି ସହ ବର୍ଷା ହୋଇପାରେ । ୬ ତାରିଖ ଦିନ ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, କେନ୍ଦୁଝର, ମୟୂରଭଞ୍ଜ, ଗଞ୍ଜାମ, ଗଜପତି ଜିଲ୍ଲାରେ ବିଜୁଳି ଘଡ଼ଘଡ଼ି ସହ ବର୍ଷା ହୋଇପାରେ । ପବନର ବେଗ ୪୦ରୁ ୫୦ କିମି ପର୍ଯ୍ୟନ୍ତ ରହିପାରେ ବୋଲି କହିଛି ପାଣିପାଗ ବିଭାଗ।

ଅନ୍ୟପଟେ ସାଟେଲାଇଟ୍ ଚିତ୍ରରେ ପାଣିପାଗରେ ବଡ଼ ପରିବର୍ତ୍ତନ ଦେଖିବାକୁ ମିଳିଛି । ପ୍ରାୟ ୧୦୦୦ କିଲୋମିଟର ଲମ୍ବର ଏକ ବିଶାଳ ମେଘମାଳା ଭାରତ ଓ ପାକିସ୍ତାନର ଏକ ବଡ଼ ଅଞ୍ଚଳକୁ ଘୋଡ଼ାଇ ରଖିଛି । ଜମ୍ମୁ କଶ୍ମୀର, ହିମାଚଳ ପ୍ରଦେଶ, ପଞ୍ଜାବ, ହରିୟାଣା, ରାଜସ୍ଥାନର ସୀମାବର୍ତ୍ତୀ ଅଞ୍ଚଳ ଉପରେ ଏହାର ପ୍ରଭାବ ରହିଛି । ଉତ୍ତର-ପଶ୍ଚିମ ଭାରତର ବିଭିନ୍ନ ରାଜ୍ୟରେ ପ୍ରବଳ ବର୍ଷା, ବଜ୍ରପାତ  ସହ ପ୍ରବଳ ପବନ ବୋହିବ ବୋଲି ଆଇଏମଡି କହିଛି । ବଜ୍ରପାତ ସାଙ୍ଗକୁ କୁଆପଥର ବୃଷ୍ଟି ସହ ହଠାତ୍ ତାପମାତ୍ରାରେ ବଡ଼ଧରଣର ପରିବର୍ତ୍ତନ ଆଣିପାରେ । ଯାହାକି ଗ୍ରୀଷ୍ମ ପ୍ରଭାବରୁ ସାମୟିକ ଆଶ୍ୱସ୍ତି ଦେଇପାରେ । ଏହି ମେଘମାଳା କୃଷି କ୍ଷେତ୍ର ଉପରେ ମଧ୍ୟ ପ୍ରଭାବ ପକାଇପାରେ। ଚାଷ ଜମିରେ ଥିବା ଶସ୍ୟ ବ୍ୟାପକ କ୍ଷୟକ୍ଷତି ହେବାର ଭୟ ରହିଛି । ଉତ୍ତରଭାରତର ଚାଷୀମାନଙ୍କୁ ସତର୍କ ରହିବାକୁ ଆଇଏମଡି ପରାମର୍ଶ ଦେଇଛି ।