କାଳବୈଶାଖୀ ଭାଙ୍ଗିଲା ଚାଷୀ ମେରୁଦଣ୍ଡ

ଭୁବନେଶ୍ୱର ଅସ୍ମିତାଟିଭି ଲାଇଭି: ତାଣ୍ଡବ କରୁଛି କାଳବୈଶାଖୀ। ସକାଳେ ଗ୍ରୀଷ୍ମ ପ୍ରବାହରେ ହସ୍ତ ସନ୍ତ ହେଉଥିବା ବେଳେ ଅପରାହ୍ନରେ ମିଳୁଛି ଆଶ୍ବସ୍ତି। ତେବେ କାଳବୈଶାଖୀ ଝଡ ପ୍ରଭାବରେ ବ୍ୟାପକ କ୍ଷୟକ୍ଷତି ଘଟିଛି। ବାସୁଦେବପୁର ବ୍ଲକ ଓ ପୌରପାଳିକାର ବିଭିନ୍ନ ସ୍ଥାନରେ ଗଛ ଭାଙ୍ଗି ଦେଇଛି ତ ପୁଣି କେଉଁଠି ବୋର୍ଡ ଉଡାଇ ନେଇଛି । ଦୀର୍ଘ ସମୟ ଧରି ବର୍ଷା ଯୋଗୁଁ ପରିବା ଚାଷୀଙ୍କ ଆର୍ଥିକ ମେରୁଦଣ୍ଡକୁ ଭାଙ୍ଗି ଦେଇଛି । ଭଦ୍ରକ ଜିଲ୍ଲାର ବାସୁଦେବପୁର ପୌରପାଳିକାର ଦେଉଳି ଗ୍ରାମରେ କାଳବୈଶାଖୀର ଅଦିନିଆ ବର୍ଷାରେ ନଷ୍ଟ ହୋଇଯାଇଛି  ପରିବା ଚାଷ । ଚାଷ ଜମିରେ ଜମି ରହିଛି ବର୍ଷା ପାଣି । ଚାଷୀମାନେ ନାଳ କରି ପାଣି କାଟୁଛନ୍ତି । କୁଆପଥର ମାଡରେ ଏକର ଏକର ଜମିର ଟମାଟ ନଷ୍ଟ ହୋଇଛି । କୁଆପଥର ମାଡରେ ବାଇଗଣ ବାଡିରେ ଭାଙ୍ଗି ଯାଇଛି ବାଇଗଣ ଗଛ । ବାଇଗଣ, ଟମାଟ, ଭେଣ୍ଡି, କାକୁଡି,କଲରା, ବୋଇତାଳୁ, ପୋଇ, ଝୁଡ଼ଙ୍ଗ ପରିବା ପାଣିରେ ଭାସୁଛି । ଦିନ ରାତି ଜମିରେ ପଡି ଚାଷୀ ପାଣି କାଟୁଛନ୍ତି । ଆଖି ଆଗରେ ଲକ୍ଷ ଲକ୍ଷ ଟଙ୍କାର ପରିବା ଉଜୁଡି ଯାଉଛି । ଲକ୍ଷ ଲକ୍ଷ ଟଙ୍କା ଋଣ କରିଥିବା ଚାଷୀଙ୍କ ମେରୁଦଣ୍ଡ ଦୋହଲାଇ ଦେଇଛିକାଳବୈଶାଖୀ । କେମିତି ଶୁଝିବେ ଋଣ ମୁଣ୍ଡରେ ହାତ ଦେଇ ବସିଛନ୍ତି ଚାଷୀ। ଚାତକ ଆଖିରେ ସରକାରଙ୍କ ସହାୟତାକୁ ଅନେଇ ବସିଛନ୍ତି ଚାଷୀ  ।