ରାଜନୈତିକ ଚକ୍ରବ୍ୟୁହ ଭେଦିଲେ ରାଘବ

ଭୁବନେଶ୍ୱର ଅସ୍ମିତାଟିଭି ଲାଇଭି: ରାଜନୀତିର ପାଣିପାଗ ଏବେ ବେଶ୍ ଗରମ! ଦିନେ ଯେଉଁମାନେ କନ୍ଧକୁ କାନ୍ଧ ମିଳାଇ ଲଢୁଥିଲେ, ଆଜି ସେମାନେ ମୁହାଁମୁହିଁ। ଆମ୍‌ ଆଦମୀ ପାର୍ଟି  ଭିତରେ ଏବେ ‘ଅଲ୍ ଇଜ୍ ନଟ୍ ଓକେ’। ସ୍ୱାତୀ ମାଲିୱାଲଙ୍କ ପରେ ଏବେ ଟାର୍ଗେଟରେ ପାର୍ଟିର ପୋଷ୍ଟର ବୟ ରାଘବ ଚଢା। ପଞ୍ଜାବର ବଡ଼ ବଡ଼ ମନ୍ତ୍ରୀ ଯେତେବେଳେ ରାଘବଙ୍କ ‘ନୀରବତା’କୁ ନେଇ ପ୍ରଶ୍ନ ଉଠାଇଲେ, ସେତେବେଳେ ରାଘବ ବି ଚୁପ୍ ବସିଲେ ନାହିଁ। ସେ ସୋସିଆଲ ମିଡିଆରେ ଏକ ଧମାକାଦାର ଭିଡିଓ ପୋଷ୍ଟ କରି ନିଜର ଶକ୍ତି ପ୍ରଦର୍ଶନ କରିଛନ୍ତି। ଏହା କେବଳ ଏକ ସ୍ପଷ୍ଟୀକରଣ ନୁହେଁ, ବରଂ ନିଜ ଦଳର ବିରୋଧୀଙ୍କ ପାଇଁ ଏକ ଖୋଲା ଚ୍ୟାଲେଞ୍ଜ।

ଘଟଣାର ମୂଳ ହେଉଛି ପଞ୍ଜାବର ସ୍ୱାର୍ଥ। ଅର୍ଥମନ୍ତ୍ରୀ ହରପାଲ ସିଂହ ଚିମା ଏବଂ ଅମନ ଅରୋରାଙ୍କ ଭଳି ହେଭିୱେଟ୍ ନେତାମାନେ ଅଭିଯୋଗ ଆଣିଛନ୍ତି ଯେ, ରାଘବ ସଂସଦରେ ପଞ୍ଜାବ ପାଇଁ ସ୍ୱର ଉଠାଇବା ପରିବର୍ତ୍ତେ ନିଷ୍କ୍ରିୟ ରହୁଛନ୍ତି। ୮୫୦୦ କୋଟିର ଗ୍ରାମୀଣ ବିକାଶ ପାଣ୍ଠି ହେଉ କିମ୍ବା ୬୦,୦୦୦ କୋଟିର ଜିଏସଟି ବକେୟା—ରାଘବ କୁଆଡ଼େ ଚୁପ୍! କିନ୍ତୁ ଏହି ‘ଅପପ୍ରଚାର’ର ଜବାବ ରାଘବ ଦେଇଛନ୍ତି ଫିଲ୍ମି ଷ୍ଟାଇଲରେ। ରାଜ୍ୟସଭାରେ ନିଜ ଭାଷଣର ଏକ ୩ ମିନିଟର ପାୱାରଫୁଲ୍ ଭିଡିଓ ସେୟାର କରି ସେ ଲେଖିଛନ୍ତି, "ଏହା ତ କେବଳ ଟ୍ରେଲର, ପିକ୍‌ଚର ଅଭି ବାକି ହେ!" ବାୟୁ ପ୍ରଦୂଷଣଠାରୁ ଆରମ୍ଭ କରି ମୋବାଇଲ୍ ରିଚାର୍ଜ ପ୍ଲାନ୍ ପର୍ଯ୍ୟନ୍ତ ସବୁଥିରେ ସେ କିଭଳି ଜନସାଧାରଣଙ୍କ ସ୍ୱର ସାଜିଛନ୍ତି, ତାହା ସେ ପ୍ରମାଣ କରି ଦେଖାଇଛନ୍ତି।

ଏହି ଲଢ଼େଇ ଏବେ କେବଳ ପଞ୍ଜାବ ପ୍ରସଙ୍ଗରେ ସୀମିତ ନାହିଁ, ବରଂ ଏହା ‘ଆପ୍’ ଭିତରେ ଥିବା ଗଭୀର ଫାଟକୁ ପଦାରେ ପକାଇଛି। ଦଳୀୟ ଅନ୍ତଃକନ୍ଦଳ ଏବେ ସିଧାସଳଖ ଆରୋପ-ପ୍ରତ୍ୟାରୋପର ରୂପ ନେଇଛି। ରାଘବ ଚଢାଙ୍କ ଏହି ପାଲଟା ଜବାବ ସଙ୍କେତ ଦେଉଛି ଯେ, ସେ ଦଳ ଭିତରେ କୋଣଠେସା ହେବାକୁ ପ୍ରସ୍ତୁତ ନୁହନ୍ତି। ଗୋଟିଏ ପଟେ ଦଳର ଶୃଙ୍ଖଳା ଏବଂ ଅନ୍ୟପଟେ ବ୍ୟକ୍ତିଗତ ପତିଆର—ଏହି ଦ୍ୱନ୍ଦ୍ୱରେ ଆଗକୁ କେଉଁ ମୋଡ଼ ନେବ ‘ଆପ୍‌’ର ରାଜନୀତି, ତାହା ଦେଖିବାକୁ ବାକି ରହିଲା। କିନ୍ତୁ ଏତିକି ସ୍ପଷ୍ଟ ଯେ, ରାଘବଙ୍କ ଏହି ‘ଟ୍ରେଲର’ ପାର୍ଟି ହାଇକମାଣ୍ଡଙ୍କ ନିଦ ହଜାଇ ଦେଇଛି।