ମହାକାଶର ଅନ୍ଧକାର ଭିତରୁ ପୃଥିବୀ ଆଡ଼କୁ ମାଡ଼ି ଆସୁଛି ଏକ ଭୟଙ୍କର ବିପଦ

ମହାକାଶର ଅନ୍ଧକାର ଭିତରୁ ପୃଥିବୀ ଆଡ଼କୁ ମାଡ଼ି ଆସୁଛି ଏକ ଭୟଙ୍କର ବିପଦ । ଯେତେବେଳେ ସାରା ବିଶ୍ୱ ନିଜ କାମରେ ବ୍ୟସ୍ତ ଅଛି, ସେତିକି ବେଳେ ବ୍ରହ୍ମାଣ୍ଡରୁ ଏକ 'ଡେଥ୍ ରକ୍' ବା ମୃତ୍ୟୁର ପଥର ପୃଥିବୀ ଆଡ଼କୁ ଅତି ଦ୍ରୁତ ଗତିରେ ଅଗ୍ରସର ହେଉଛି । ଏହି ଗ୍ରହାଣୁର ନାମ ହେଉଛି ‘Asteroid 2026 JH2’ । ବୈଜ୍ଞାନିକମାନଙ୍କ ଚିନ୍ତା ବଢ଼ାଇ ଏହି ମହାକାଶୀୟ ପଥରଟି ଆସନ୍ତା ସପ୍ତାହରେ ପୃଥିବୀର ଅତି ନିକଟ ଦେଇ ଅତିକ୍ରମ କରିବ।

ବୈଜ୍ଞାନିକଙ୍କ ତଥ୍ୟ ଅନୁଯାୟୀ, 2026 JH2 ଗ୍ରହାଣୁର ଆକାର ପ୍ରାୟ ୫୦ ରୁ ୧୧୫ ଫୁଟ ମଧ୍ୟରେ ହୋଇପାରେ । ଏହା ଏକ ବିଶାଳକାୟ ବସ୍ ବା ଏକ ବହୁତଳ ପ୍ରାସାଦ ସହିତ ସମାନ । ଯଦିଓ ଏହା ଦେଖିବାକୁ ଛୋଟ ମନେ ହେଉଛି, କିନ୍ତୁ ଏହାର ଗତି ଏବଂ ଘନତ୍ୱ ଏହାକୁ ଅତ୍ୟନ୍ତ ବିପଜ୍ଜନକ କରିଦେଇଛି । ୨୦୧୩ ମସିହାରେ ଋଷର ଚେଲିୟାବିନ୍ସକରେ ଯେଉଁ ଗ୍ରହାଣୁ ବିସ୍ଫୋରଣ ହୋଇଥିଲା, ଯାହାଫଳରେ ହଜାର ହଜାର ଲୋକ ଆହତ ହୋଇଥିଲେ ଏବଂ କୋଠାବାଡ଼ି ଭାଙ୍ଗିରୁଜି ଯାଇଥିଲା, ଏହି ନୂଆ ଗ୍ରହାଣୁଟି ପ୍ରାୟ ସେତିକି ବଡ଼ ବୋଲି ଆକଳନ କରାଯାଉଛି ।

ସବୁଠୁ ଡରାଇଲା ଭଳି କଥା ହେଉଛି ଏହାର ଦୂରତା । ସାଧାରଣତଃ ଗ୍ରହଣୁଗୁଡ଼ିକ ପୃଥିବୀଠାରୁ ଲକ୍ଷ ଲକ୍ଷ କିଲୋମିଟର ଦୂରରେ ଯାଆନ୍ତି, କିନ୍ତୁ 2026 JH2 ପୃଥିବୀର ଅତି ନିକଟକୁ ଚାଲିଆସିବ । ମେ’ ୧୮ ତାରିଖରେ ଏହା ପୃଥିବୀଠାରୁ ମାତ୍ର ୯୧,୦୦୦ କିଲୋମିଟର ଦୂରତାରେ ରହିବ । ଆପଣ ଜାଣି ଆଶ୍ଚର୍ଯ୍ୟ ହେବେ ଯେ, ପୃଥିବୀ ଓ ଚନ୍ଦ୍ର ମଧ୍ୟରେ ଯେତିକି ଦୂରତା ଅଛି, ଏହି ଗ୍ରହାଣୁଟି ତା’ର ମାତ୍ର ଚାରି ଭାଗରୁ ଏକ ଭାଗ ଦୂରତାରେ ରହିବ । ଅର୍ଥାତ୍ ମହାକାଶ ବିଜ୍ଞାନ ଦୃଷ୍ଟିରୁ ଏହା ପୃଥିବୀକୁ ପାଖାପାଖି ଛୁଇଁକି ବାହାରିଯିବ ।